Hukumar Yaki da Sha da Fataucin Miyagun Kwayoyi ta Kasa (NDLEA) ta kama wani dan kasuwa dan Angola mai shekaru 42, Mbala Abuba, a Filin Jirgin Sama na Mallam Aminu Kano (MAKIA) dake Kano.
An kama shi yana kokarin safarar hodar iblis 120 da ya hadiye zuwa birnin Istanbul a kasar Turkey.
An cafke Abuba ne a ranar Talata, 25 ga Fabrairu, a wurin binciken fasinjoji a filin jirgin Kano, yayin da yake kokarin shiga jirgin Egypt Air MS 880 da zai tashi zuwa Istanbul ta hanyar Cairo.
Binciken hoton jikinsa ya nuna yana dauke da muggan kwayoyi.
Bayan haka, an saka shi a karkashin kulawa don fitar da abin da ya hadiye, inda ya fitar da hodar iblis guda 120 mai nauyin 1.829 kilograms a cikin sau bakwai.
A cewar kakakin NDLEA, Femi Babafemi, Abuba, wanda ya fito daga lardin Zaire a Angola, ya bayyana cewa a da yana aikin sufurin kayayyaki a cikin birane kafin ya shiga safarar miyagun kwayoyi.
An kama wani dan kasuwa yana kokarin aika hodar iblis a cikin kayan mota
A wata sabuwar opereshen da NDLEA ta kaddamar, jami’anta sun hana Okeke Ebuka, wani dillalin kayan gyaran mota, kokarin aikawa da hodar iblis nauyin 1.10 kilograms zuwa Angola ta hanyar sanya ta a cikin propellers na mota.
An gano hodar ne a wurin jigilar kaya na Filin Jirgin Sama na Murtala Muhammed (MMIA) a Lagos.
An kama Ebuka a ranar 25 ga Fabrairu bayan samun sahihan bayanan sirri. A lokacin bincike, ya bayyana cewa yana kasuwanci ne da kayan gyaran mota a ASPANDA Trade Fair Complex dake Lagos.
An kama wani da hodar iblis nauyin 5.40kg a cikin mota
A wani yunkuri na hana safarar miyagun kwayoyi, jami’an NDLEA sun kama wani Ezechi Iyke a ranar 23 ga Fabrairu.
An same shi da hodar iblis nauyin 5.40 kilograms a cikin wata mota Toyota Sienna.
An kama shi ne bayan makonni na bincike da kuma sa ido da aka yi masa.
NDLEA na cigaba da yakin wayar da kai kan miyagun kwayoyi
A yayin da take cigaba da yakin dakile shan da fataucin miyagun kwayoyi (WADA), NDLEA ta gudanar da shirin wayar da kai a makarantu, wuraren aiki, majami’u, masallatai da al’ummomi.
Wasu daga cikin makarantun da suka amfana da wannan shiri sun hada da:
- Ansarudeen Junior Secondary School, Lagos
- Loretto Girls Special Science School, Anambra
- Tudun Murtala Special Primary School, Kano
Shugaban NDLEA, Brigadier General Buba Marwa (mai ritaya), ya jinjinawa jami’an hukumar a Tin-can, Delta, Edo, Oyo, Kano, Osun, Borno, Zamfara, da Kwara bisa kokarin da suke yi na kama masu safarar miyagun kwayoyi da hana yaduwarsu a cikin al’umma.
