Hukumar ƙwallon ƙafa ta Turai, UEFA, ta yanke hukuncin dakatar da alkalin wasa na Ingila, David Coote, har zuwa ranar 30 ga Yuni, 2026.
Hukumar ta tabbatar da wannan mataki a ranar Juma’a.
A watan Disamba da ya gabata, hukumar da ke kula da alkalancin wasa a Ingila ta kori Coote, bayan wani faifan bidiyo da ya bayyana a shafukan sada zumunta, inda aka ji yana yin maganganu marasa kyau kan tsohon kocin Liverpool, Jürgen Klopp.
UEFA ta kuma fara bincike a kansa, bayan wani bidiyo ya bayyana yana zargin yana shakar farin gari da ake tunanin wani abu ne mai sa maye a lokacin gasar Euro 2024.
A sabbin hukuncin da hukumar ladabtarwa da kula da halayyar ɗabi’a ta UEFA ta fitar, an tabbatar da cewa Coote an haramta masa duk wani aiki da ya shafi alkalanci a UEFA.
An dakatar da shi ne saboda karya ka’idojin ɗabi’a da kuma kawo tozarta ga wasan ƙwallon ƙafa, musamman UEFA.
